යොහානි ට රාජ්‍ය සම්මානයක් ලබා දීමට තීරණයක්

0
21

ජාත්‍යන්තරයට ශ්‍රී ලංකාවේ නාමය රැගෙන ගිය යොහානි ද සිල්වා කලාකාරිනිය හට රාජ්‍ය සම්මානයකින් ගෞරව පුද කිරීමට බලාපොරොත්තු ‌වන බව ජාතික උරුම, ප්‍රාසාංග කලා හා ග්‍රාමීය කලා ශිල්පී ප්‍රවර්ධන කටයුතු රාජ්‍ය අමාත්‍ය විදුර වික්‍රමනායක මහතා පවසයි. යොහානි ද සිල්වා වෙනුවෙන් ආණ්ඩුවෙන් කළ යුතු යුතුකමක් තිබෙනවා නම් එසේ කිරීමට අදහස් කරන්නේ කුමක්දැයි යනුවෙන් සමගි ජන බලවේගයේ පාර්ලිමේන්තු මන්ත්‍රී හේෂා විතාන මහතා අද (04) දිනයේ පාර්ලිමේන්තුවේ දී ඇසූ පැනයකට පිළිතුරු ලබාදෙමින් රාජ්‍ය අමාත්‍යවරයා මේ බව කියා සිටියේය.

හේෂා විතාන – “අපේ රටේ තරුණ පරම්පරාවේ අලුත් ගායිකාවක්, තරුණ ගායිකාවක් අද ජාත්‍යන්තරයට ගිහිල්ලා තියෙනවා.  මං හිතන්නේ ලංකාවට වැඩිය ඉන්දියාව විශේෂයෙන්ම යොහානි සිල්වා ගායිකාවට ආදරය කරනවා. ඒ තරුණ ගායිකාව වෙනුවෙන් අපි රජයක් විදියට මං හිතන්නේ කිසිම දෙයක් කරලා නැහැ මේ වෙන කොට, දැනෙන දෙයක්. පෞද්ගලික රූපවාහිනී මාධ්‍යවලින් දෙන හයිය විතරයි පේන්නේ.  යොහානි සිල්වා වෙනුවෙන් ආණ්ඩුවෙන් කළ යුතු යුතුකමක් තියෙනවා මේ වෙලාවේ, ඒ වෙනුවෙන් යම් දෙයක් කරන්න අදහස් කරනවා ද?”

රාජ්‍ය අමාත්‍ය විදුර වික්‍රමනායක – “අනිවාර්යයෙන්ම මේ වෙන කොටත් ඒ කටයුතු ගරු අමාත්‍යවරයා හැටියට ගරු අග්‍රාමාත්‍යතුමා ආරම්භ කරලා තියෙනවා. රාජ්‍ය සම්මානයකින් මේ කලාකාරිනියට ගෞරව උපහාර පුද කරන්නටත්, එතැන් පටන් අලුත් වැඩපිළිවෙලක් යටතේ, අපේ රටේ කලාවට සම්බන්ධ විශේෂයෙන්ම ඒ කෘතීන් සංරක්ෂණය කිරීම හෝ ඒ අයගේ අයිතිය තහවුරු කිරීමේ වැඩපිළිවෙලක් නැහැ. අන්න ඒ වැඩපිළිවෙල අපි ආරම්භ කරලා තියෙනවා. ඒවගේ වැඩපිළිවෙල් තුළිනුත් මෙවැනි කලාකරුවන්ගේ අයිතීන් ආරක්ෂා වෙන, වරප්‍රසාද ආරක්ෂා වෙන වැඩපිළිවෙලක් අපි නිර්මාණය කරන්නට ඔ්නේ. අපි එක වෙලාවක් විතරක් සම්මානයක් පුදකරලා, එහෙම නැත්නම් එක වෙලාවක් විතරක් වේදිකාවක් උඩ ගෞරවය පුද කරලා කලාකරුවෙක්ව සතුටු කරන්නට බැහැ. ඒ ක්‍රමවේදයන්ට අපි එකඟ නැහැ. ජීවිතය පුරා ගෞරවයක් අභිමානයක් එක්ක ඒ කලාකරුවාට කලා කටයුතුවල යෙදීමේ වැඩපිළිවෙලයි අපි බලාපොරොත්තු වෙන්නේ. මේ කලාකාරිනියටත්, යොහානිටත් අපි අනිවාර්යෙන්ම ඒ ගෞරවය පුද කරනවා. ශ්‍රී ලංකාවේ නම ජාත්‍යන්තරයට මෑතක දී ගෙනියපු කලාකාරිනිය හැටියට ඒ කලාකාරිනියට අපේ ගෞරවය පුදකරමින් එතුමියටත් විශේෂයෙන් ඒ කළ යුතු ආකාරයේ ගෞරව උපහාර පුදකරමින් කලා ක්ෂේත්‍රයේ සියලු දෙනාටම අභිමානයක් ඇතුව ජීවත් වීමේ වටපිටාව නිර්මාණය කරන්නයි බලාපොරොත්තු වෙන්නේ.”

LEAVE A REPLY

Please enter your comment!
Please enter your name here